BUTUAN CITY – Napalayas na sa Philippine Coast Guard ang Chinese Research Vessel nga nasigpatan sa Philippine Exclusive Economic Zone sukad niadtong Mayo 1 sa gilay-ong 92 nautical miles gikan sa amihanang baybayon sa Ilocos Region.
Subay niini, gideploy gilayon sa PCG ang coast guard vessel ug usa ka aircraft aron hagiton ug i-escort ang Chinese ship pagawas sa maong lugar.
Atol sa operasyon, nakita sa PCG ang usa ka manned deep-sea submersible nga Shenhai Yongshi (Deep-Sea Warrior), nga dala matud pa sa barko sa China, kauban ang usa ka rigid-hull inflatable boat ingon man ang yellow-colored nga kahimanan kansa posibleng gamit alang research nga gihimo sa nasangpit nga barko. Sumala sa PCG, nakalapas sa balaod Pilipinas ilabina sa Exclusive Economic Zone niini ang gihimong research sa China.
Sa kasamtangan, wala pay tubag niini ang Chinese Embassy sa Pilipinas.
