BUTUAN CITY – Niigo sa Ben Gurion Airport sa Israel ang gipalupad nga missile sa Houti rebel sa Yemen karong adlawa, Mayo 4. Kahibaloang ang Ben Gurion ang main international airport sa Israel.
Tungod sa maong missile, napuno og aso ang bisinidad sa nasangpit nga paluparan, rason usab nga nangatarantar ang mga katawhan nga anaa sa maong lugar.
Kahibaloang mas gipaspasan pa sa mga Houti rebels ang pagpalupad nini og mga missile ngadto sa Israel isip pakighiusa sa mga Palistinong biktima sa gyera sa Gaza.
Sumala ni senior Israeli police commander, Yair Hetzroni, nahagsa matud pa ang maong missile sa kalsada sa parking lot sa Terminal 3 sa maong airport.
Subay niini, nagpagawas usab og bahad si Israeli Defense Minister Israel Katz, diin sumala niini nga si kinsa mang nihimo kanila og dautan, balikan usab og kadaot sa makapito ka pilo.
