BUTUAN CITY – Kasamtangan pang nagpa-alim sa balay-tambalanan ang usa ka babaye nga angkas sa motorsiklo nga ningbangga sa lain usab nga motorsiklo sa may National Highway, Purok 4, Barangay San Vicente, Sibagat, Agusan del Sur.
Sumala sa imbistigasyon sa kapulisan, namatay matud pa ang drayber sa duha ka motorsiklo nga nailang sila Juan Abregana Dupio, hamtung, minyo, mag-uuma, ug residente sa Purok 7, Brgy. Lower Bucac, Bayugan City, ingon man si Antonio Maquiemay Bello, 55 anyos, minyo, ug usa ka panday.
Sigon sa imbistigasyon sa Sibagat Municipal Police Station, anaa sa impluwensya sa ilimnung makahubog si Bello dihang nagmaneho kini uban sa iyang asawa nga si Jessel Ronda Bello.
Gikan ang duha sa dereksyon sa Butuan padulong sa Bayugan, ug pag-abot niini sa lugar sa nadisgrasyahan, kalit na lamang matud pang niliko ang motor ni Bello ug ningbangga sa gimanihuan usab ni Juan Abregana Dupio, uban sa angkas niini nga menor de edad kansa walay tatsa sa nasangpit nga panghitabo.
Sa kasamtangan, anaa na sa kustodiya sa Sibagat Municipal Police Station ang duha ka motorsiklo alang sa tukmang disposisyon.
