BUTUAN CITY – Dako ang pagtoo sa amahan sa 7-anyos nga batang babaye nga gilugos og gipatay niang nakalabayng adlaw dinhi sa dakbayan sa Butuan nga nakasuyop sa ilegal nga droga ang suspetsado sa maong krimen. Sigon sa amahan sa maong bata, wala siya makadungog nga migamit og ilegal nga drogas ang suspek nga nailang si Dondon Acedo, 29-anyos, gwardya, ug residente sa susamang barangay diin diin nahitabo ang krimen.
Apan hugot kining nagtoo nga positibo ang suspek sa illegal nga drugas tungod sa kangil-ngig sa iyang gihimo ngadto sa iyang anak. Gibutyag pa sa amahan nga mag-agihan ang suspek sa ilang balay diin makita pa niining hatag-hatagan og bisan unsa ang iyang anak ug istoryahon pa kini sa suspek.
Daghan matud pa ang ka-inom sa suspek niadtong gabie sa Marso 14, ug pagka-alas 2:00 sa kaadlawon gisulod niini ang ilang balay agi sa pansayan.
Gikahibulong usab sa amahan nga wala sila kamatikod sa suspek, bisan ang ilang iro wala usab kapaghot. Gi-alsa matud pa nga tulog ang iyang anak ug gidala sa balay sa suspek og didto niya gipanamastamasan. Nakadagan pa ang biktima apan nakuha ra gihapon kini sa suspek ug milampos gayud kini sa pagbuhat sa kremin.
Gihulatan na lamang sa Butuan City Police Station 4 ang resulta sa drug test sa suspetsado kinsa gikostudiya na sa kapulisan ug gi-andam na usab ang mga dokumento alang sa ipasakang kaso nga rape with homicide.
