BUTUAN CITY – Nadugangan pa ang mga pangalan nga gikan sa sikat nga mga pagkaon sa listahan sa matud pa, “non-existent” nga resibo sa confidential funds gikan sa Office of Vice President. Kini subay na usab sa taho ni House Deputy Majority Leader ug La Union Rep. Paolo Ortega kagahapong adlawa.
Sigon sa kongresista nga nadugang sa mga katingad-ang pangalan ang “Jay Kamote,” “Miggy Mango,” ug laing lima ka mga indibidwal nga dunay pangalang “Dodong” diin may managlahing apleyedo sama nalang nila Dodong Alcala, Dodong Bina, Dodong Bunal, Dodong Darong, ug Dodong S. Barok. Sumala ni Ortega, makapabalaka ang kalehitimo sa nasangpit nga mga pangalan ug gikwestyon usab niini kung tinood ba ang maong mga tawo nga nakadawat og kwarta gikan sa confidential ug intelligence funds gikan sa buhatan ni VP Sara.
Dugang sa mambabalaod nga kaduha-duhaan ang nasangpit nga mga pangalan nga sama ra gihapon sa kanhi nilang nadeskubrehang mga pangalan nga daw kinupya sa mga pangalan sa junk foods ug restaurants. Subay pa ni Ortega nga ang mga pangalan nga Jay Kamote ug Miggy Mango, kay kumpermadong wala nakapatik sa Philippine Statistics Authority’s (PSA) records for birth, marriage, o kaha death certificates.
Nag-ugat ang maong isyu sa pagkadiskubre sa kapin mil-900 ka mga kadudahang pangalan nga na-link sa gi-alegahang misused confidential funds sa Office of the Vice President ni Vice President Sara Duterte. Una nang gikataho sa PSA nga daghan sa mga pangalan nga anaa sa listahan nga nakadawat og kwarta gikan sa Confidential Funds sa Bise Presidente ang walay rekord sa ilahang mga talaan.
