BUTUAN CITY – Nagtuo ang Department of Health kon DOH nga dunay epekto ang climate change kon pagbag-o sa klima sa sayo nga pagsaka sa kaso sa dengue karong tuiga.
Sumala ni DOH Assistant sec. Albert Domingo, sayo nga nagsugod ang ting-ulan tungod sa weather patterns nga shearline, inter-tropical convergence zone kon ITCZ, ug easterlies nga kasagarang masinatian unta sa Hunyo ug Hulyo.
Sumala sa DOH, mas ubos ang mortality rate sa maong sakit karong tuiga, nga anaa lamang sa 0.36% kon itandi sa 0.43% sa susamang panahon niadtung 2024. Pasabot nga sa matag 1,000 ka pasyente, tulo ngadto sa upat ang mamatay.
Taliwa niini, subling gipahimangnuan ang publiko nga dili magkumpyansa, tungod kay mahimong musaka na usab ang mga kaso sa dengue kung dili ipadayon ang pagpanglimpyo ug uban pang pag-amping.
Gitambagan usab ang publiko nga magpahiling gilayon sa doktor kung makasinati og mga sintomas sa dengue aron malikayan ang grabeng mga kondisyon.
