BUTUSN CITY – Malipayong gitaho ni Bombo International News Correspondent Reverend Fr. Coke Daryl Prieto direkta gikan sa Rome, Italy nga matag adlaw dunay maayong kalambuan ang panglawas ni Pope Francis.
Sigon ni Fr. Prieto sa eksklusibong pakighinabi sa Bombo Radyo Butuan, sukad niadtong Pebrero 14, kada-gabii nga magpagawas ang Vatican og medical report sa kahimtang ni Pope Francis.
Sumala pa niini, bisan og anaa pa gihapon sa kritikal nga kondisyon ang Santo Papa, apan kada-adlaw dunay mahinungdanon nga kalambuan sama na lang sa nawala nang renal insufficiency niini, gipahinayan na ang kakusgon sa oxygen intake ug dunay normal progress ang gihambin niining pneumonia.
Samtang gibutyag usab ni Fr. Prieto nga midagsa ang mga tawo sa Roma aron mag-ampo alang sa Santo Papa nga pamatood lang nga pinaagi sa pagka-ospital ni Pope Francis, nagkahiusa ang katawhan diha sa pag-ampo.
Kini matud pa ang gipakitang pagka-amahan sa Santo Papa nga nagtudlo kanato nga mobalik sa Ginoo ug mobalik sa pag-ampo. Alayon niini, gihangyu sa pari ang tanan nga mag-ampo alang sa Santo Papa.
