BUTUAN CITY – Off-limits una sa media ang patay’ng lawas sa rebeldeng lider nga si Myrna Sularte kon Ka Maria Malaya nga anaa sa usa ka pribadon punerarya ning siyudad sa Butuan human siya napatay sa engkwentro sa bukirang bahin sa utlanan sa Purok 4 ug 5 sa Sitio Imelda, Brgy. Antongalon ning siyudad kagahapon tali sa kasundaluhan.
Kini isip paghatag og respeto sa hangyo sa mga kabanay niini samtang giproseso pa ang mga kinahanglang buhaton alang sa iyang haya.
Sa eksklusibong pakighinabi sa Bombo Radyo Butuan, gibutyag ni 1st Lt. Ian Lalata, ang Civil Military Operations kon CMO officer sa 30th Infantry Battalion, Philippine Army, andam nilang ihatag ang patay’ng lawas sa rebel leader ngadto sa iyang pamilya tungod kay ila kining katungod nga mapahiluna kini sa iyang katapusang pahulayanan ilabina kung mahikay na sa mga hingtungdan ang gikinahanglang mga dokumento.
Andam usab silang hatagan og siguridad ang haya ni Ka Maria Malaya ilabina nga una na kining na-turn over sa kapulisan ug napa-ilalom na sa local autopsy.
Aminado si Lt. Lalata nga dili nila target nga patyon gayod ang rebeldeng lider apan tungod kay engwkentro ang nahitabo rason nga wala’y pili-on ang ma-igo sa mga bala. anaa pa gihapo’y presensya sa mga rebeldeng NPA sa encounter site human naka-agbat ang gibana-banang 15 ngadto sa 20 ka mga ka-ubanan ni namatay’ng rebelde.
Base sa ilang monitoring, si Ka Maria Malaya na lang ang nahabiling taas nga opisyal sa rebeldeng grupo ang naglihok sa kabukiran sa Agusan ug Surigao provinces ug pipila ka parte sa Northern Mindanao.
