BUTUAN CITY- Naghaon og disbarment complaint kontra kang kanhi presidente Rodrigo Duterte ang pipila ka mga human rights group sama sa KARAPATAN kauban ang mga pamilya sa mga biktima sa extra-judicial killings (EJK) sa Korte Suprema karong adlawa Biyernes, Enero 17.
Unod sa maong reklamo, ang paghangyo nga ma-disbar si kanhi Pangulong Duterte isip abogado tugod sa paglapas matud pa niini sa Code of Professional Responsibility and Accountability (CPRA) ingon man sa Conduct unbecoming a lawyer kon pagpakita sa batasan nga dili angayan sa usa ka abogado.
Sumala sa usa sa mga complainant nga si Atty. VJ Topacio, giduol na matud pa sa ilahang grupo ang maong reklamo sa korte suprema tungod kay tibook termino matud pa ni Duterte, puros ra pangbastos sa mga babaye ug pamalikas ang nakita kaniya.
Kahibaloan nga anak si Atty. VJ Topacio sa mga gipatay nga peace consultants sa National Democratic Front of the Philippines (NDFP) nga sila Agaton Topacio ug Eugenia Magpantay kansa gikatahong biktima usab sa EJK ilawom sa Duterte administration. Gipasaka ang maong dibarment kang Duterte human ningbuto ang balita nga gusto matud pa niining mamahimong abogado ni VP Sara Duterte sa tanang giatubang niining 3 ka mga impeachment complaint human gibalibaran sa Bise Presidente ang offer sa amahan niini nga kwartang pambayad matud pa sa abogado alang sa maong impeachment complaint.
Dala sa mga complainant nga human rights advocates ang mga placard kansa dunay nawong sa kanhi Pangulo ug duna usay mga nakasulat nga mamamatay tao ug bastos kini, rason nga wala matud pa kini katakus nga mamahimong abogado.
Gawas kang Atty. Topacio, anaa usab sa maong pagpaska og complaint si Karapatan Secretary General Tina Palabay, Fr. Manuel Gatchalian, Bayan Secretary General Raymond Palatino, Hustisya Secretary General Ofelia Balleta, Llore Pasco, Rosenda Lemita, Liezel Asuncion, Lean Porquia, Saturnino Ocampo, Norma Dollaga, Orly Marcellana, Gabriela Dalena, J. Luis Burgos, Bonifacio Ilagan, Sr. Eleanor Llanes, ug Tina-Agel Romero.
Samtang, sumala ni kanhi chief presidential legal counsel Salvador Panelo, wala matud pay basehan para i-disbar ang kanhi Pangulo. Sumala niini nga walay korte sa nasod nga nag-convict sa kanhi Presidente sa bisan usa mang krimen kalabot na sa EJKs.
Dugang ni Atty. Panelo nga expression ra matus pa sa kanhi Pangulo ang pagpamakikas niin.
