BUTUAN CITY – Magpadayon ang pagtanyag og libreng bakuna kontra sa flu, pneumococcal, ingon man Human papillomavirus kun HPV sa Department of Health – Caraga alang niadtung mga nag edad og 18 anyos pataas kansa dunay comorbidities, ingon man niadtung mga mabdos, senior citizen, ug mga batang babaye nga mga Grade 4 ug Grade 7.
Magsugod ang nasangpit nga pagpang apod-apod sa bakuna karong Disyembre 26 ngadto sa 28 ning kasamtangang tuig diin ipahigayon sa usa ka mall ning dakbayan.
Available sa maong vaccination ang Flu Vaccine alang sa mga Senior Citizens ug indibidwal nga 18 anyos pataas nga dunay co-morbidities, ingon man niadtung mga mabdos. Ang Pneumococcal vaccine usab mamahimong maavail sa mga senior citizens lamang. Mamahimo usab nga ma-avail sa mga Seniors ug sa mga Grade 4 ug Grade 7 students nga mga kababayen-an ang HPV vaccine.
Alayon niini, giawhag sa lokal nga pangamhanan ingon man sa DOH Caraga ang mga indibidwal nga mamahimong mo duaw sa venue alang sa pagpabakuna sa nahisgutang adlaw.
