BUTUAN CITY – Gipasalamatan ni Mary Jane Veloso si Pangulong Ferdinand Marcos Jr ug Indonesian Prabowo Subianto og ang tanang mitabang aron kini makabalik sa Pilipinas human ang 14 ka tuig nga pagkapriso sa Indonesia.
Kagabii, miabot si Veloso sa Soekarno-Hatta International Airport samtang pabalik na sila sa nasud.
Sigon pa niini nga gusto niyang maka-simba pag-abot sa Pilipinas. Kauban niining misakay sa eroplano ang pipila ka mga opisyal sa Department of Foreign Affairs (DFA) sa pagpanguna ni Undersecretary Eduardo de Vega.
Pag-abot sa Pilipinas unyang alas 6:00 sa buntag, modiretso gelayon siya sa Correctional Institution for Women sa siyudad sa Mandaluyong alang sa lima ka adlaw nga quarantine.
Gikalipay usab sa mga senador ang pagpauli na ni Maryjane Veloso. Sigon ni Senadora Imee Marcos, hilabihan ang iyang pasalamat sa gobyerno sa Indonesia nga mitugot sa pagpauli ni Veloso sa nasud.
Samtang sa kabahinan ni Senador Francis Tolentino, gibutyag niining usa ka dakong kadaugan sa administrasyong marcos ang pagpauli ni Mary Jane sa Pilipinas.
Mahinumdumang nag-atubang sa silot kamatayon ang 39-anyos nga si Veloso human nga makuhaan siya og 2.6 kilos nga heroin sa Indonesia niadtong 2010.
Tuig 2015 sa dihang temporaryong gikansela kaniadto ni Indonesian President Joko Widodo ang iyang nakatakdang pagbitay.
Niadtong nakalabay nga buwan sa Nobyembre nakabaton og kasabutan ang Pilipinas ug Jakarta aron ibalhin sa nasud si Veloso.
