BUTUAN CITY – Gikumpirma sa foreign ministry sa Bolivia nga dili mu-ubos sa 200 ka mga sundalo ang gi-hostage sa mga armadong supporters sa kanhi presidente nga si Evo Morales. Sigon sa Bolivia’s military, gikontrola sa armadong grupo ang usa ka military facility duol sa Cochabamba City. Sigon sa foreign ministry, gipang-embargo sa grupo ang mga armas ug mga bala samtang tulo ka mga military units usab ang gi-atake sa mga iregular nga grupo.
Makita ang mga naglinyang sundalo nga gibinaklid ang mga kamot samtang gipalibutan sa mga membro sa armadong grupo. Ang siyudad sa Cochabamba sa central Bolivia, balwarte sa daghang mga supporters sa kanhi presidente. Human nasayran ang pag-take over sa grupo sa maong military facility, gi-anunsyo sa militar ang paghikling sa ilang mga personahe uban sa ilang mga pamilya.
Samtang usa sa mga na-hostage nga sundalo ang nagbutyag nga gi-demand sa grupo nga hunungon na sa mga otoridad ang pagpanghilabot sa mga barikada.
Nasayrang naghimo og mga barikada ang mga supporters ni Morales sa tibuok nasud sulod na sa 19 ka mga adlaw dayong demand nga hunungon na ang imbestigasyon ngadto sa kanhi presidente sa alegasyong statutory rape ug human trafficking kansa iya nang gipanghimakak.
