BUTUAN CITY – Nagdeklara na og State of Calamity ang tibook Bicol Region kagabie human sa walay puas nga ulan tungod sa bagyong Kristine, kansa anaa na storm signal number 2.
Nasinatian ang baha sa maong lugar nga lapas na sa tawo, ug sa ubang dapit usab ning-abot na sa atop. Sa mga videos nga gi-upload online, makita ang kusog nga bul-og sa baha sa ubang mga lugar sa maong rehiyon, sama sa Barangay Bonbon, Libon, Albay, diin makita nga daw falls na sa ka kusog ang tubig baha nga ning subay sa kalsada.
Sa Legazpi City, Albay usab, makita ang tulay nga gilamoy na sa baha, apan nanabok gihapon ang ubang mga residente sa maong lugar agi sa railings. Sa munisipyo usab sa Libog sa susamang probinsya, makitang duna nay balay nga gi-anod sa baha.
Sa Pili, Camarines Sur, gimando na sa lokal nga pangamhanan ang “forced evacuation” tungod sa taas nga lebel sa baha nga dugangan pa sa kusog nga hangin ug wala’y undang nga ulan.
Nagpahimano na ang Philippine Institute of Volcanology and Seismology kon PHIVOLCS ngadto sa mga residente nga mahimong mu-awas gikan sa bulkang Mayon ang lahar.
Tungod sa nagkagrabeng sitwasyon sa Albay, gi-ablihan na sa Bicol University sa Legazpi City ug Darag, Albay Campuses ang ilahang mga pasilidad alang sa mga manghikling nga pamilya.
