BUTUAN CITY – Posibleng ipagawas na sa Commission on Elections kon COMELEC sunod semana ang kumpletong listahan sa mga kandidatong nahukman na og perpetual disqualification.
Sigon ni COMELEC Chairman George Erwin Garcia, giplastar na nila ang listahan sa mga kandidatong una nang gihukman sa Ombudsman nga ‘perpetually disqualified’ kon tibuok kinabuhing dili na makakupot og bisan unsa mang public office.
Sigon sa election chief, ilhon ug irespeto nila ang desisyon sa Ombudsman kalabot sa perpetual disqualification, bisan pa man og duna pay natanggong nga apela ang usa ka kandidato.
Ang bugtong ikonsidera lamang nila kung duna’y gipagawas ang Korte Suprema nga temporary restraining order (TRO) batuk sa diskwalipikasyon sa mga kandidato. Dugang ni Garcia, duna’y mga eksperto ang komisyon nga na-assign aron tun-an ang kaso sa mga kandidato kondiin tun-an una nila og maayo ang listahan adiser ipagawas sa publiko.
