BUTUAN CITY-Gisang-at na sa National Bureau of Investigation kon NBI ang nagkalain-laing mga kaso batuk kang dismissed Bamban, Tarlac Mayor Alice Guo human nadiskubrehan nga dili iyang pirma ang gipanotaryohan nga counter-affidavit sa iyang human trafficking case.
Sumala ni NBI Director Jaime Santiago, ila nang gisang-at ang reklamong falsification by a notary public, use of falsified documents, perjury, ingon man obstruction of justice batuk kang Guo ingon man kang Atty. Elmer Galicia, ang abogado nga nag-notaryo sa nasangpit nga counter-affidavit. Una nang gikataho ni Guo atul sa pagdungog sa Senado nga nakagawas na siya sa nasod niadtung Hulyo ug naperhmahan na niini ang mga counter affidavit adiser pa kini ginotaryohan ni Galicia.
Apan sumala ni NBI Task Force Alice Guo head agent Palmer Mallari, dili si Guo mismo ang niperma sa maong mga dukomento, kundili laing tawo, base na sa nakolektang mga specimen signatures ni Guo gikan sa mga orihinal niining dokumento sa Bamban, Tarlac.
Sa kasamtangan, padayon pa usab ang imbistigasyon sa National Bureau of Investigation sa pagkakutay ni Guo isip espiya.
Sa pagkutlo ning balita wala pay tubag ang kampo ni Guo mahitungod sa findings sa NBI ingon man sa gipasaka niining reklamo batok sa kanhi Mayor. Subay niini, gisang-at na usab ang disbarment complaint batuk kang Atty. Galicia sa Supreme Court.
