BUTUAN CITY – Dalhon na ugmang adlawa Lunes, ni human rights lawyer Atty. Harry Roque ngadto sa Korte Suprema ang iyang petisyon batuk sa gihimong imbestigasyon sa House Quad Committee nga nagkutay kaniya ngadto sa operasyon sa mga offshore online scams ug mga gambling rings nga nailang Philippine Offshore Gaming Operators kon POGOs.
Sa iyang gipagawas nga pinakabag-ong video, gibutyag ni Roque nga gusto niyang ang Korte Suprema ang magdesisyon kung sakto ba ang gihimo sa Kongreso nga nag-abusar sa ilang gahom kansa makita matud pa diha sa mga resource persons nga ilang gipang-imbitar.
Kung dili matud pa makuha ang ilang gustong impormasyon, ilang ipa-contempt ug kung duna’y mapuga gamay, ikonsidera gilayong tinuod aron lang ang tanan, mapadulong kang kanhi Pangulong Rodrigo Duterte. Kung unsa matud pa ang mamahimong desisyon sa Kore Suprema, anda niya kining sundon.
Hugot usab nga gipanghimakak ni Atty. Roque ang alegasyon ni House Quad Committee over-all chairman ug Surigao del Norte Rep. Robert Ace Barbers nga incorporator matud pa sa Lucky South 99 ang iyang asawa nga si Mylah. Sumala sa gipagawas nga video ni Harry Roque, bugtung ang kalambigitan lamang sa iyang asawa mao ang korporasyon sa ilang pamilya kansa maoy nanag-iya sa ilang balay sa Baguio City diin nadakpan ang usa ka Chinese nga nag-abang.
Apan sumala ni Roque, wala’y koneksyon ang pagkasikop sa nasangpit nga Chinese sa POGO tungod kay didto kini nag-atubang og kaso sa China nga giduso ngadto sa International Police kon International Criminal Police Organization kon InterPol.
Ang pamahayag ni kanhi Presidential spokesperson Harry Roque.
Kasamtangan nga gipangita karon sa mga otoridad si Roque tungod sa contempt order nga gipakanaog kaniya sa Kongreso tungod matud pa sa kapakyas niini pagsubmite sa mga gipangayo kaniyang dukomento.
