BUTUAN CITY – Pabiling naguna ang dakbayan sa Butuan sa isip dunay pinakadaghang kaso sa Human Immunodeficiency Virus kon HIV gikan sa mga syudad sa rehiyon sa Caraga. Kini human ning saka ngadto sa 442 ka mga kaso sa Human Immunodeficiency Virus kon HIV ang natala sa dakbayan, sigon sa bag-ong datus nga gipagawas sa Department of Health kon DOH Center for Health Caraga, ingon man sa Epidemiology Bureau sa Central Office sa maong departemento.
Sumala sa maong datus nga gikan niadtung 1995 ngadto na sa Hunyo ning tuiga, duna nay kinatibuk-ang 1,718 ka mga kaso sa HIV ang natala sa rehiyon sa Caraga, 94% niini, kon bugti sa 1,622 ang natala sa mga kalalakihan; 6% niini kay natala sa mga kababayen-an, kon bugti lamang sa 96 ka mga indibidwal.
Sumala ni Anton Torralba, Regional Program Officer sa Sustained Health Initiatives of the Philippines kon SHIP, nanguna gihapon sa maong kaso ang dakbayan sa Butuan, diin sukad niadtung Mayo ning tuiga, asa natala lamang ang 420 ka mga kaso, nadugang matud pa ang 22 ka mga indibidwal sulod lang sa usa ka bulan. Rason nga ning kasamtangang bulan, anaa na sa 442 ka mga kaso ang natala sa dakbayan.
Sa Agusan del Norte natala usab ang 122 ning bulana, diin dunay 9 ka mga indibidwal nga nadugang gikan sa 113 niadtung Mayo; Sa Agusan del Sur, nadugang ang 13 ka mga kaso sukad niadtung Mayo, diin duna lamay 280, apan karon , anaa na kini 122 ka mga kaso. Nagpabilin usab nga anaa sa 31 ka mga kaso ang natala sa Dinagat Island sukad sa nahisgutang bulan. Apan sa Surigao Del Sur, natala ang 9 usab ka mga nadugang nga kaso, diin sukad sa 216 nga kaso niadtung Mayo, anaa na kini karon sa 225; ug sa Surigao Del Norte, dunay nadugang nga 6 ka mga kaso, diin sukad sa 130 niadtung Mayo, anaa na kini karon sa 136.
Apan subay ni Torralba nga agud nagpabilin lamang ang kaso sa Dinagat Island sa 31, tungod kay wala matud pay “testing on the ground”. Kini nagpasabot nga sa umalabot nga bulan, lauman matud pa nga dunay taas nga pagsaka ang matala sa maong probinsya tungod kay gipakusgan naman sa pangamhanan ang testing sa nasangpit nga lugar.
Alayon niini, sulod sa 1,718 ka mga kaso sa HIV ning bulan sa Hunyo, 6 niini ang nag edad og 15 paubos; 194 usab ang nag edad og 15 ngadto sa 24; samtang 850 ang sa nag edad og 25 ngadto sa 34, kansa mao usab ang pinakadaghan; 235 usab ang sa nag edad og 35 ngadto sa 49; ug 33 sa mga anaa na sa panuigung 50 pataas.
