BUTUAN CITY – Malampusong natanom kagahapong adlawa, ang 350 ka mga Talisay seedlings ug mangrove propagules, uban sa coastal clean-up, sa may San Roque Beach, Brgy. Punta, Nasipit, Agusan del Norte sa pagpanguna sa Philippine Ports Authority – Port Management Office Agusan.
Mi-abot sa 150 ka mga partisipante ang miduyog sa pagsugod sa Maritime and Archipelagic Nation Awareness Month kon MANA Mo, lakip ang Department of Environment and Natural Resources – Community Environment and Natural Resources Office kon DENR-CENRO, Globalport Agusan Terminal Inc. (GATI), Vertex, LGU Nasipit, PCG Nasipit, ug uban pang mga boluntaryo gikan sa nagkalain-laing sektor, security services, ug lokal nga kagamhanan.
Tumong sa MANA Mo ang pagpakita sa kamahinungdanon sa mga maritime domain sa Pilipinas ug pagpalambo sa pagpanalipod sa kina-iyahan. Gipalig-on usab niini ang panaghiusa sa komunidad ug dedikasyon sa pagtubag sa mga hagit sa pagbag-o sa klima ug pagpauswag sa mga programa sa kinaiyahan.
