BUTUAN CITY – Nasakmit ni Carlos Yulo ang pinaka unang bulawang medalya sa Pilipinas sa floor exercise gymnastics sa 2024 Paris Olympics nga gihimo sa Bercy Arena.
Natala ni Yulo ang iskor nga 15.000 alang sa 6.600 nga difficulty ug 8.400 alang sa execution, rason nga giparot niini ang defending champion nga si Artem Dolgopyat sa Israel.
Giparot sa Pinoy ang Israeli nga nakasakmit lamang og iskor nga 14.966, igo na aron mo saka sa podium isip silver medalist. Ning sakmit usab og 14.933 ang half-Pinoy nga si Jake Jarman sa Great Britain alang sa ikatulong pwesto.
Si Carlos lamang ang bugtong atleta sa walo ka mga competitor sa maong event ang nakakuha og 15-poin mark human sa perfect landing niini sa katapusang bahin sa iyahang routine.
Kini na ang ikaduhang bulawang medalya sa kasaysayan sa Pilipinas diin ang pinaka-una, mao ang bulawang medalya nga nasakmit ni Hidilyn Diaz-Naranjo alang sa weightlifting competetion niadtung Tokyo Olympics 2020.
Subling makig tigi si Yulo ugmang adlawa, Agosto 4, alang usab sa gymnastics vault.
