BUTUAN CITY – Nagpositibo sa doping test ang usa ka Iraqi judoka kon judo player nga magdula unta sa Paris Olympics.
Naila ang maong atleta nga si Sajjad Sehen, 28 anyos ug unang higayong misalmot sa pinakadakong sports competition sa tibuok kalibutan kinsa nagpositibo sa duha ka anabolic steroids nga metandienone ug boldenone.
Tungod niini, temporaryong gisuspende ang maong atleta samtang gi-andam ang disciplinary case batuk kaniya.
Sigon sa International Testing Agency, ang ahensiyang nagdumala sa anti-doping program sa International Olympic Committee, dili makadula, maka-compete, maka-training o kaha mag-coach si Sehen sa entiro duration sa Olympics.
Mu-away unta siya sa men’s 81 kilogram class sugod sunode semana, ilalom sa round of 32 ug awayon unta niya ang pambato sa Uzbekistan.
Siya ang pinaka-unang nagpositibo sa doping test karon nga Olympics.
Madumdumang niadtong Tokyo Olympics, mi-abot sa unom ka mga atleta ang nagpositibo sa illegal substance ug hingpit nga gidid-an pagdula sa tagsa-tagsa nila ka sporting event.
