BUTUAN CITY-Mitaliwan na kagahapon sa buntagang bise presidente sa Socorro Bayanihan Services Inc. nga si Mamerto Galanida sa edad nga 82-anyos. Matod sa National Bureau of Investigation, namatay si Galanida tungod sa pipila ka komplikasyon sa medisina ingon man sa katigulangon na usab niini.
Una nang nireklamo si Galanida sa pipila ka mga sakit niini hangtod nga gitugot sa korte ang iyang apela alang sa hospital arrest niadtong mi-aging semana ug gibalhin kini sa usa ka medicine facility sa Parañaque City.
Nasayrang nagserbisyo og 3 ka termino isip mayor sa munisipalidad sa Socorro, Surigao del Norte si Galanida ug kanhi usab kini provincial board member sa maong lalawigan Kahinumdumang nalambigit kini sa kontrobersiya sa Socorro Bayanihan Services Inc. human gibulgar sa priviege speech ni Senador Risa Hontiveros nga duna matud pay usa ka grupo sa kulto nga nalambigit sa forced marriage sa mga menor de edad, human trafficking, sexual violence ug financial extortion.
Gi-akusahan si Galanida nga maoy nanguna sa mga ilegal nga kalihokan sa nasangpit nga kulto. Lakip sa gipasakaan og kaso sa Department of Justice sa Surigao sila si Jey Rence Quilario nga maoy presidente sa Socorro Bayanihan Services Inc. ug gi-ila sa bansag nga Senior Agila kinsa pag-umangkon ni Galanida ug ang lain pang 12 ka nila ka mga ka-uban.
