BUTUAN CITY – Hugtanong gipadayag ni Defense Secretary Gilberto Teodoro nga gituyo ug dili aksidente o kaha misunderstanding ang nahitabo sa Ayungin Shoal niadtong June 17, kondiin usa ka navy personnel ang naputlan og kumagko sa kamot tungod sa agresibong aksyon sa China Coast Guard.
Sigon ni Teodoro, base sa pamahayag ni Pangulong Ferdinand Marcos Jr., dili mausab ang polisiya sa Pilipinas mahitungod sa isyu sa West Philippine Sea ug bisan kanus-a dili isurender sa Pilipinas ang bisan usa ka pulgada sa atong teritoryo.
Sumala sa kalihim, bisan kanus-a dili magpa-ulipon ang Pilipinas sa bisan unsang nasud ug ipadayon sa militar nga depensahan ang teritoryo ug ipatuman ang sovereign rights sa nasud.
Dili usab kinahanglan nga mangayo og permiso sa bisan kinsa sa pagtuman sa gipanumpaang katungdanan partikular sa West Philippine Sea.
Pamugos pa ni Teodoro, magpadayon ang rotational and resupply mission sa Ayungin Shoal alang sa mga sundalo nga naka-station sa BRP Sierra Madre.
