BUTUAN CITY – Nasabtan ni Professor Gerry Caño, Presidente sa Professional Criminologists Association of the Philippines kon PCAP ang nahimong tubag sa gobyerno sa Pilipinas sa pinaka-ulahing tensiyon sa West Philippine Sea diin dunay mga nasamdan nga personahe sa Philippine Navy og duna pay usa nga naputlan sa tudlo.
Sigon ni Professor Caño nga bisan og tataw nga agression ang gihimo sa Chinese Coastguard ngadto sa mga sundalo, wala gihapon kini gikonsidera nga armadong pag-atake hinoon duna matud pay wala pagsinabtanay rasong nahitabo ang insidente.
Sumala pa niini nga nasabtan niya kini nga posisyon tungod kay dili man gayud andam ang Pilipinas nga molambigit sa armed conflict. Makita matud pa kini sa direksiyon sa palisiya sa Marcos Administration nga ang nag-unang katuyuan mao ang seguridad sa ekonomiya aron mahatagan ang nag-unang panginahanglan sa katawhan.
Tungod niini, ang dapat nga ka-alyado sa Pilipinas mao ang silingang mga nasud sama sa China.
Pinakamaayo matud pang lakang nga himoon sa administrasyong Marcos mao ang pagmugna og economic partnership sa China aron makabenipisyo sa paglambo sa ekonomiya. Kung pabilin matud pang modikit ang Pilipinas sa US magpabilin usab nga aggressive ang China.
Gipahayag usab sa professor ang sakit nga kamatooran nga walay molaban kanato sa higayong dunay giyera, ma-China man kini o Estadus UNidos.
Kini tungod kay mangayu usab og bahin ang nasangpit nga mga nasud aron dunay mabalik sa ilang panudlanan gikan sa gasto nga hatud sa pagsuporta sa Pilipinas..
