BUTUAN CITY – Bisan og wala pa magsugod ang plano sa gobyerno nga pagbaligya og bugas sa tag P29 matag kilo, nipahinumdom ang Department of Agriculture (DA) sa mga konsumidor nga dili abusohan ang maong programa.
Ang maong apelar sa nasangpit nga ahensya, nunot sa kabalaka nga magbalik-balik ang mga konsumador taliwala sa limitasyon sa gidaghanon nga mapalit sa matag pamilya.
Sigon ni DA Spokesperson Assistant Secretary Arnel de Mesa, target sa gobyerno nga makabenepisyo ang mga marginalized sector sa maong programa busa kinahanglang sabton sa mga konsumidor nga limitado lang ang ilang mapalit.
Gipahinumdoman sa opisyal sa DA ang mga publiko nga dili magpasobra sa ilang paliton, arun ma-accomodate usab ang ubang mamalit.
Gipasabot pa ni De Mesa nga ang maong programa usa lamang ka supplemental option sa mga kabus nga pamilya aron matubag ang ilang mga galastohan.
Sa inisyal nga plano, kadto lang nahisakop sa marginalized sector ang makapalit sa maong mga bugas, sama sa single parent, PWDs, pobreng pamilya, ug uban pa.
Gilauman nga ipagawas sa DA ang lagda sa pagpatuman sa programa, sa dili pa kini magsugod sa Hulyo, 2024.
