BUTUAN CITY – Gikumpirma sa Armed Forces of the Philippines kon AFP nga usa ka service member sa Philippine Navy ang naka-angkon og grabeng injury tungod sa intentional high-speed ramming sa China Coast Guard sa barko sa Pilipinas atol sa rotation and resupply mission sa Ayungin shoal niadtong Lunes sa buntag, Hunyo 17.
Sigon ni AFP Public Affairs Office chief Colonel Xerxes Trinidad, ang na-angol nga sakop sa Navy, luwas ug natambalan na dayong butyag nga dili na madawat pa ang padayong agresibo ug dili propesyunal nga taras sa China Coast Guard batuk sa lehitimong humanitarian mission sa Pilipinas.
Taliwa niini, nagpabiling committed ang AFP sa pagpabilin sa ilang presensiya sa West Philippine Sea.
Una nang gikataho nga dili mu-ubos sa 8 ka mga Philippine Navy personnel ang angol apil na ang usa nga naputlan og usa ka kumagko human gibabagan, gibanggaan ug misaka pa ang mga sakop sa China Coast Guard sa usa ka Rigid Hull Inflatable Boat nga gipadala sa Philippine Navy aron maghatod og mga suplay alang sa mga sundalong naka-istasyon sa BRP Sierra Madre.
Gikumpiska usab sa China ang mga tag-as nga kalibre sa armas gikan sa mga sakop sa Navy, ug gibuslutan pa ang usa sa mga Rigid Hull Inflatable Boats.
