BUTUAN CITY – Ning byahe pa-Mecca, Saudi Arabia ang anaa sa 5,060 ka mga Pilipinong Muslims alang sa hajj pilgrimage. Kini ang gikumperma sa National Commission on Muslim Filipinos (NCMF), Biernes, Hunyo 14, 2024.
Sumala ni NCMF executive assistant Raffie Usman nga anaa sa maayong mga kamot ang mga debotong Filipino-Muslims. Kahibaloan nga nagsugod na ning adlawa ang hajj, diin molungtad kini sa petsa 19.
Ang hajj, kon ang pag-baktas patuyok sa Kaaba – ang sagradong bahin sa Grand Mosque sa Mecca, usa sa lima ka mga pillars sa Islam, kansa himoon sa mga maayo pa’g lawas nga mga Muslim bisan kausa man lang sa ilahang kinabuhi.
Gipadala sa Saudi Arabia ang mga debotong Pilipino pinaagi sa Department of the Interior and Local Government sukad naidtung Mayo 27 ngadto sa Hunyo 1.
Duna usay mga special lanes nga gigahin sa mga tugpahanan alang sa maong mga deboto nga mga Muslims. Diin makasulod ang mga niini pinaagi sa ilahang mga QR codes sa mga ID’s nga gihatag kanila.
Makadawat usab og P7,500 nga refunda ang maong mga mobisita sa Mecca karong tuiga, sumala sa National Commission on Muslim Filipinos (NCMF).
