BUTUAN CITY – Nagpakasal sa 80-anyos na nga senior citizen ang usa ka 23-anyos pa nga dalaga sa China. Naila ang babaye nga si Xiaofang, ug ang lalaki usab, na ila lamang nga si Mr. Li.
Kahibaloan nga nagtrabaho si Xiaofang sa usa ka retirement home sa Hebei Province sa Northern China, asa nagpuyo si Mr. Li.
Dali matud pa nga nahimong magbest friends ang duha human nasuta nga parehas sila og mga hilig sa kinabuhi. Kini ang rason nga ningbati ang duha og romatikong paghinigugmaay.
Nakadesisyon gilayon sila nga magpakasal bisan kon babag sa ilahang relasyon ang ilahang matag pamilya. Sa kasal, walay ni usa sa ilahang paryente ang nanambung, apan gipadayon gihapon kini sa tigulang ug dalaga tungod sa ilahang gugmang di mapugngan sa baha.
Daghang mga netizens ang ningtaas ang kilay ngadto sa babaye tungod matud nila, kwarta ra ang apas niini sa tiguwang, apan gipamatud-an ni Xiaofang nga sayop ang ilahang mga gipanghuna-huna pinaagi sa pagpublikar sa ilahang relasyon ni Mr. Li sa social media, diin gibulgar niini nga siya ang nagbuhi nilang duha ni Mr. Li sa pinansyal nga bahin tungod kay wala matud pay kwarta ang tiguwang. Duna matud pa kini pensyon, apan dili kini igo alang kanilang duha isip magtiayon.
Sumala sa babaye nga na inlove siya sa tiguwang nga sama na og edad sa iyahang apohan dili tungod sa kwarta ug unsa pa man, apan tungod matud pa kay ningbati siya og gugma sa maturity ni Mr. Li, ingon man sa mga panlantaw niini sa iyahang kinabuhi.
