BUTUAN CITY – Wala pay pinal nga resulta sa listahan sa mga tournament managers nga ipadala sa Palarong Pambansa, kini ang giklaro ni Mr. Pedro Tecson, ang tipamaba sa Department of Education kon DEPED Caraga.
Ang maong anunsyo nunot sa mga balitang daghan matud pa sa mga Tournament Managers sa rehiyon ang gipang tanggal sa listahan sa mga ipadala sa Palarong pambansa sa Sugbo karong umalabot nga Hulyo 6, ug gipangpulihan matud pa kini og laing mga pangalan.
Pasabot sa opisyal nga daghan ang kinahanglan nga agihan sa mga tournament managers aron malakip kini sa lista sa mga ipadala sa Palarong Pambansa, sama nalang sa mga assessments nga himoon sa gi-hire sa buhatan sa Department of Education kon DEPED nga mga eksperto sa managlahing sports discipline.
Gilangkuban ang maong assessments sa mga physical ingon man written exams, kansa kinahanglan nga pasaron sa mga gusto, o kaha niadtung mga girekomenda nga maka uban sa Palarong Pambansa. Dugang niini, gikinahanglan usab ang maong mga personahe nga mo kuha og mga courses arun lang mo-qualify sa maong papel.
Tungod sa maong mga requirements, duna gayud matud pay ma reclassify ug dili mo-qualify sa nahisgutang papel.
Pasabot usab sa maong opisyal nga bisan gani matud pa kung ang mga Class A lamang sa mga aspiring nga tournament managers ang gimando sa sentrong buhatan sa DEPED nga ipoadala ngadto kanila, gipadala gihapon sa buhatan sa DEPED Caraga ang mga Class B ug C nga mga pangalan, kini isip buffer na usab kung ugaling mag kulang man gani og tawo ang Caraga region sa Palarong Pambansa. Apan gihatagan niini og gimbug-aton nga wala pay gi rekomenta ang central office nga pangalan ngadto kanila.
Ang mga Tournament Managers, mao ang mga tighan-ay sa tanang panginahanglanon sa mga atleta sa matag rehiyon, sama nalang sa pagkaon, transportasyon, schedule sa mga atleta ug uban pa. Gidetermina usab ang maong mga personahe sa managlahing classes nga mao ang Class A, B, ug C, pinaagi sa evaluation nga gihimo sa mga consultants.
