BUTUAN CITY – Tumang kabalaka, sagul kapungot ang gibati sa usa ka Information Technologist human niini nasakpang dugay ra diayng gigamit sa scammer ang iyahang identidad arun maka-scam og mga ML players.
Sumala ni Awill Jay Macalisang, hingkod, kanhing taga Magallanes, Agusan del Norte ug kasamtangang nakabase sa dakbayan sa Cagayan de Oro, nga hag-as na lamang dunay mga nang chat kaniya mahitungod sa “baligya” niiini nga accounts sa Mobile Legends isip mid, kon tigpataliwala sa buyer sa baligya nga account ug sa seller niini.
Sa pagduki-duki, nasuta sa nahisgutang biktima nga kuyanap na diay ang iyahang pangalan ug nawong sa mga Mobile Legends group, tungod kay daghan na ang mga nabiktima sa poser niini nga nagtangag sa pangalan nga “Jay Macalisang”.
Makita sa mga post sa poser account nga tag-dinagko na nga mga kantidad ang gipangluwat niini sa iyahang mga biktima.
Dugang ni Awill Jay, siya pa ang gibali sa suspetsado isip poser, “Imagine 3 years na nga poser and ako pa ang gi ingun nga poser.” post niini sa iyahang social media human nasuta nga nagpost usab ang suspek nga likayan ang “poser” account kansa mao ang tinood nga Facebook name niini.
Sa kasamtangan, ning dangop na ang biktima sa mga kapulisan alang sa tukmang imbistigasyon.
Hangyo ni Awill sa mga Mobile Legends aficionados nga likayan ang pagtuo-tuo sa mga namaligya og ML accounts, tungod kay lagmit, scam ra ang mga niini.
Naglaum usab ang nahisgutang biktima nga malimpyo na ang iyahang pangalan sa ML world, tungod kay nibati man kini og kaulaw ngadto sa mga nabiktima sa iyahang poser.
