BUTUAN CITY – Gi-adaptar karon sa United Arab Emirates ang work-from-home scheme tungod sa wala pa paglurang sa tubig-baba nga hatud sa kusog nga pagbundak, sa ulan tungod sa mi-igo kanila nga low pressure area.
Sa eksklusibong pakighinabi sa Bombo Radyo Butuan, gibutyag ni Bombo international correspondent DJ Bobby Ero nga bisan og wala na’y mga pag-ulan, panalogdog ug pagpangilat sa ilang dapit sa Sharjah, padayon karon ang gihimong siphoning kon pagsuyop sa tubig diha sa kadalanan ilabina sa Dubai City nga padayong gi-ulan aron madali na pagbalik ang normal nga dagan sa trapiko.
Dili na matud pa katingalahan sa maong nasud kung duna’y kusog nga ulan tungod kay dili man makaya sa ilang drainage canal ang bul-og sa tubig-ulan rason sa mamugnang baha.
Kagahapon, nag-deploy na ang UAE government og 600 ka mga trak nga maoy naghigop sa tubig aron madali ang operasyon sa ilang transport sector rason nga duna na’y tulo ka mga metro stations ang balik na sa ilang operasyon. Samtang ang operasyon sa ilang airport, naka-hold pa gihapon ang operasyon rason nga wala pa’y gitugutang makabiyahe. (REPORTS FROM: Bombo Lilibeth Ruiz)
