BUTUAN CITY – Padayon pang gi-imbestigahan sa ginsakpan sa Butuan City Police Station 4 kung duna ba’y kalambigitan sa sa usa’g usa ang sunod nga pagpamusil-patay sa duha ka tawo nga sakop sa ilang area of responsibility.
Kini human nga napalgan kagahapong adlawa didto sa Purok 5, Brgy. Sumilijon ang patay’ng lawas ni Eldy Navallo Jr., 34-anyos, alyas Oplok, duna’y ka-ipon ug duna’y samad-pinusilan sa nagkada-iyang parte sa iyang lawas.
Ang pagkakaplag sa iyang patay’ng lawas, natigayon human gipusil-patay sa Purok 3, Brgy. Taguibo ning siyudad sa Butuan ning mi-aging Huwebes sa buntag ang motoristang gitu-uhang mao si George Ranalan, nag-abang og boarding house sa Brgy. Mahogany ning siyudad.
Sigon ni Butuan City Police Office spokesperson PCaptain Anne Cubio, gipa-cross examine pa ang mga bala nga narekober sa duha ka crime scene.
Nasayran nga ang patay’ng lawas sa ikaduhang biktima nga si Navallo, narekober human kini nakit-an sa caretaker sa yuta didto sa hilit nga bahin. Apil sa ilang gisuta ang rason nganong naka-abot siya sa maong hilit nga lugar.
Migawas sa inisyal nga imbestigasyon nga niadto matud pang Huwebes sa buntag, nakadungog siya og mga buto sa armas apan gibalewala lamang niya kini sa pagtuong duna lama’y nangayam hangtud nga napalgan ang maong patay’ng lawas kagahapon
