BUTUAN CITY – Temporaryong gipahunong sa lokal nga kagamhanan ning siyudad sa Butuan ang operasyon sa Sentro poultry farm sa may Purok 5, Brgy. Los Angeles ning siyudad sa Butuan isip tubag sa petisyong gipasaka sa mga residente tungod sa dili masingo nga baho sa ilang waste materials ug sa sobra kadaghan sa mga langaw nga nangdagsa sa sulod ug gawas sa kabalayan.
Gikumpirma kini ni Glenn Betco, ang environmental management specialist sa Butuan City Environment and Natural Resources Office kon City-ENRO sa eksklusibong pakighinabi sa Bombo Radyo.
Gipadayag sa opisyal base kini sa ilang rekomendasyon uban ang ubang concerned local government offices human ang ilang gihimong inspeksyon.
Sigon ni Betco dili pa tugutang maka-operate ang maong manukan hangtud nga dili masunod sa nagtumala niini ang tanang rekisitos nga ilang gihatag sa ingon dili na ma-usab ang mga senaryo nga una nang gireklamo sa mga residente.
Sa pikas bahin, dako ang pagpasalamat sa mga residente sa ngadto sa Bombo Radyo human nga temporaryong napasira sa lokal nga kagamhanan ang maong poultry farm nga maoy tuburan sa ilang magsiyam ka tuig na nga problema sa polusyon.
Kini human usab na-aksyunan sa mga hingtungdang local government offices ang ilang gidusong petisyon batuk sa maong manukan tungod sa dala niining sobra kabaho sa palibot tungod sa kawala’y saktong labayanan sa hugaw sa mga manok apil na sa ang grabe kadaghan usab sa mga langaw nga musalo na nila panahon sa tingkaon ug sa tanang oras kada-adlaw.
Sigon ni Allan Peregrino, nahatagan og kasulbaran ang dugay na nilng gi-agwanta nga problema dili lang sa ilang lugar kondili apil na ang luyo sa manukan nga mao ng Purok 3, Brgy. Sumilihon.
