BUTUAN CITY – Gihulatan pa sa tanan ang mahimong reaksyon o kaha pamahayag sa Armed Forces of the Philippines kon AFP human gikumpirma sa Communist Party of the Philippines kon CPP nga patay na ang ilang mga tag-as nga lider nga sila Benito Tiamzon ug Wilma Austria-Tiamzon, kinsa ilang gika-ingong gi-torture ug gipatay matud pa sa tropa sa gobyerno niadtong Agusto 21 ning mi-aging tuig.
Sigon sa CPP, midagan pa og pila ka mga buwan ang ilang gihimong imbestigasyon adiser nakumpirma ang kamatayon nila Benito kon alyas Ka Laan, chairperson sa ilang central committee ug Wilma kon “Ka Bagong-tao”, ang ilang secretary-general, kinsa una nang gika-ingong namatay sa pagbusikad sa usa ka baroto sa kadagatan sa Samar atol sa gilusad nga operasyon sa Armed Forces of the Philippines.
Kini ginegar sa CPP dayong butyag nga ang wala matud pa’y armas nga mga Tiamzons ug lain pang walo ka mga rebelde, gipangpara dihang nagbiyahe sila sa Catbalogan City, gibihag, gi-torture ug matud pa, gipamatay.
Ka-uban sa mga Tiamzons sila CPP-Eastern Visayas subregional secretary Joel Arceonga mas nailang si “Ka Divino”, ug mga membro sa guerrilla force sa central headquarters nga nailang sila Ka Yen, Ka Jaja, Ka Matt, Ka Ash, Ka Delfin, Ka Lupe ug Ka Butig.
Gilabay matud pa ang ilang mga patay’ng lawas sa usa ka motorboat nga duna’y mga eksplosibo nga gi-detonate. Base sa nakuhang impormasyon sa Central Committee, grabe ang pag-antus sa mga Tiamzons human gipangkulata sa mga nagkupot kanila.
Sa ila matud pang nakuha nga mga internal reports, gisaysay sa mga nakasaksi nga ilang nakita kung gi-unsa gipangbuk-an sila sa ilang nawong gamit ang mga gahing butang.
Ang una nang nabani-og nga engkwentro ug pagbusikad taliwa sa dagat, mga drama lang matud pa sa AFP ug sa ilang mga US military advisers, aron matago ang tanang mga ebidensya sa maong kremin.
