BUTUAN CITY – Nahimong highlight sa pagsa-ulog sa lokal nga kagamhanan ning siyudad sa Butuan sa ika-81 nga kasumaran sa Adlaw ng Kagitingan kaganinang buntag ang paghatag og tribute ngadto sa mga beterano sa ikaduhang gubat sa kalibutan.
Apil na niini ang paghatag og importansya sa sakripisyo nga ilang gihimo aron makuha ang kagawasan nga atong natagamtaman karon.
Nasayrang si Butuan City ug Agusan del Norte 1st District Rep Jose Aquino II ang nanguna sa paghalad og buwak nga gipahigayon sa Butuan City Library grounds.
Nanawagan siya sa tanan nga dili kalimtan ang mga sakripisyo ug paghalad sa kinabuhi sa atong katigulangan aron lang ma-angkon ang pila ka gatus ka tuig nga gipangandoy nga kagawasan sa katawhang Pilipino.
Gipasalig usab niini nga matukod na ang gisaad niyang dakbalay alang sa mga beterano sulod sa kampo sa 402nd Brigade, Philippine Army.
Gisaluduhan usab sa mga opisyal sa lokal nga kagamhanan apil na sa kasundaluhan, kapulisan ug uban pang mga ahensiya sa gobyerno sa ka-isog nga gipakita sa mga sundalong beterano.
Mi-abot sa 40 ka mga beterano ubansa ilang pamilya ang mitambong sa nasangpit nga kalihukan.
Sa mensaheng gibilin ni Mayor Ronnie Vicente Lagnada nga gibasa usab ni Konsehal Omar Andaya, gibutyag niini nga naghatag og inspirasyon sa tanan karong adlawa ang paghandom sa pagkabayani ug ka-isog sa atong katigulangan nga nakigbatuk sa mga langyaw’ng pwersa aron lang atong ma-angkon ang kagawasan nga ato karong natagamtaman.
