BUTUAN CITY – Gidala na sa mga ginsakpan sa 1303rd Maneuver Company, Regional Mobile Force Batallion kon RMFB-13 ngadto sa Provincial Forensic Unit sa Agusan Del Sur Police Provincial Office ang nakumpiskang mga armas, mga bala og eksplosibo nga gipanag-iyahan sa New People’s Army kon NPA.
Kini human nadiskubrihan ang maong arms cache nga gilubong sa bukirang parte sa Sitio Boom, Tudela Dam, Tudela, Trento, Agusan del Sur kaganinang buntag.
Ang mga nakumpiska gilangkuban sa usa ka homemade m16 rifle; duha ka rifle grenade; duha ka bala sa grenade launcher; 49 ka bala sa M14; 27 ka bala sa M16; 4 ka M14 magazines; tulo ka magazines sa M16; og usa ka grenade launcher ammo bandolier.
Gihimo ang operasyon sa pagpanguna sa 1303rd Maneuver Company kauban ang lain pang unit sa kapulisan, kasundaluhan gikan sa 67th Infantry Batallion og 3012 Air Intelligence and Security Squadron Unit.
Kini tungod sa sunod-sunod nga intelligence report nga nadawat og sa pagbulgar usab sa kanhe rebelde mahitungod sa nahimutangan sa maong arms cache nga gipanag-iyahan sa mga rebeldeng naglihok sa maong lalawigan.
Sa kasamtangan gikustudiya na sa Agusan Del Sur Police Provincial Office ang nakuhang arms cache alang sa tukmang disposasyon.
