BUTUAN CITY – Gipahiluna sa usa ka punerarya ang tulo ka patay’ng lawas sa rebelding New People’s Army kon NPA human ang engkuwentro batuk sa kasundaluhan kaganinang alas 9:10 sa buntag sa bukirang parte sa Barangay Kolambugan, Sibagat, Agusan del Sur.
Nasayrang nagpahigayon og combat operation ang mga ginsakpan sa 65TH Infantry Battalion, Philippine Army sa nasangpit nga lugar sa dihang naka-agbat ang gibana-banang 30 ka mga rebelde gikan sa SYP 21A, Guerilia Front 21, SRC, sa North Eastern Mindano Regional Command nga padayon pang gisuta ang nangulo niini.
Human sa 20 minutos nga engkuwentro, walay natalang nasamdan sa panig sa gobyerno apan sa dihang gihimo ang clearing operation, didto nakita ang tulo ka patay’ng lawas sa mga rebelde.
Narekober usab sa lugar nga nahitaboan ang tulo ka M16 Rifle 7.62mm, og 6 ka jungle packs nga dunay sulod nga mga personal nga kagamitan nga gikustudiya sa 65TH Infantry Battalion, Philippine Army alang sa tukmang disposasyon.
Samtang gipahibalo na usab ang Barangay Kapitan og ang munisipyo aron mapahibalo og maila ang napatay nga mga rebelde.
