BUTUAN CITY – Hugot nga gikondena ni Datu Rico Maca, ang Indigenous People Mandatory Representativekon IPMR sa San Miguel, Surigao Del Sur ang padayong pagpangrecruit og pagpangilad sa New People’s Army kon NPA ngadto sa tribung kumunidad sa probinsiya. Kini ang gipagawas nga pamahayag ni Datu Maca human usab sa kamatayon sa duha ka rebelde human na-engkuwentro sa kasundaluhan.
Hilabihan matud pa kalooy ang kahimtang sa tribu nga gipahimuslan sa teroristang NPA aron guboton ang malinawon nga pagpuyo og gubaon ang kaogmaon sa mga kabataang nga tribu.
Nasayran nga natigayon ang engkuwentro niadtong Huwebes Santo, Abril 14, 2022 pasado alas 10:20 sa gabii didto sa Brgy. Agsam, Lanuza, Surigao del Sur.
Base sa gipagawas nga impormasyon sa kasundaluhan, nakadawat matud pa silag taho mahitungod sa presensiya sa walhong grupo nga nagplanong bulabogon ang kasaulogan sa Semana Santa. Kini ang rason sa daling pagresponde sa mga ginsakupan sa 36th Infantry Battalion, Phlippine Army pinaagi sa combat operation sa lugar.
Miabot sa 10 ka minutos ang natigayong engkuwentro tali sa kasundaluhan og gibana-banang 10 ka rebelled gikan sa Platoon 2, Guerilla Front 30 sa pagpanguna ni Noel T. Alacre. Miresulta kini sa kamatayon sa 2 ka rebelde samtang nakumpiska ang musunod: usa ka AR15 nga armas, usa ka CZ858 rifle, usa ka mubo nga magazine sa AR15 nga adunay 18 ka mga buhing bala, 5 ka magazine sa CZ858 rifle nga adunay 123 ka mga buhing bala, usa ka bandolier, 50 kilos nga bugas, 55 ka nakalain-laing de-lata, ug usa ka flashlight.
Sigon ni 36IB Commanding Officer Lt Col Michael Rey S. Reuyan, ang maong engkwentro resulta sa walay hunong nga combat operation ug suporta gikan sa mga komunidad sa Surigao del Sur.
Mapasalamaton ang opisyal sa suporta ug impormasyon nga gihatag sa mga lokal ug komunidad sa Lanuza, Surigao Sur. Subay niini, gipanawagan usab ni 901st Brigade Commander, Brig. Heneral George L. Banzon, ang naglihok pas kabukiran nga mga rebelde nga mosurender na og mobalik sa ilang pamilya.
Kini dayung hanyag sa Enhanced Comprehensive Local Integration Program kon E-CLIP sa gobyerno diin ang mga benipisyo niini ilang matagamtaman.
