BUTUAN CITY – Inay nga magsa-ulog sa ika-82 anyos nga adlaw’ng natawhan sa iyang lola, nagsubo na hinuon ang pamilya Sta. Iglesia human gipusil-patay sa mga rebeldeng New People’s Army kon NPA kaganinang ala-1:30 sa kaadlawon ang Civilian Active Auxiliary kon CAA member samtang naglitson didto sa P-4B, Brgy. Taligaman ning siyudad sa Butuan.
Naila ang biktimang si Richie Maluya Sta. Iglesia, 26-anyos, duna’y ka-ipon ug aktibong CAA member nga na-assign sa Bugsukan Platoon Battalion ug residente sa P3, Brgy. Bugsukan, ning siyudad.
Migawas sa inisyal nga imbestigasyon sa Butuan City Police Station 4 nga naglitson ang biktima sa gawas sa balay sa iyang lola ka-uban ang tulo niya ka mga igsoon usa si Jemark Mariguit Dorado dihang kalit lang miduol ang duha ka mga rebeldeng NPA nga nakamalong dayong pusil sa iyang likod.
Gidala pa kini sa Butuan Medical Center aron unta tambalan apan gideklara kining dead on arrival sa attending physician.
Narekober sa crime scene ang tulo ka mga gitiro na nga cartridges sa 5.56 mm pistol.
Sigon ni Remedios Sta. Iglesia, iyaan sa biktima, naglitson matud pa si Richie uban sa lain pa nilang mga kabanay aron unta ipakaon sa mga tawong magmanyanita sa iyang inahan dihang kalit lang nga miduol ang duha ka mga lalaking naka-malong.
Gipusil gilayon si Richie kinsa nakadagan pa apan gigugkod kini ug gitiwasan hinungdan sa iyang hinanaling kamatayon.
Dugay na matud pang gisundan sa mga rebelde ang iyang pag-umangkon tungod sa pagsulod niini sa Civil Active Auxiliary kon CAA hangtud nga hingpit nang gitiro kaganina.
Gikumpirma usab ni Ka Diwa Habagat, nagpa-ilang tigpamaba sa New People’s Army kon NPA-Agusan del Norte nga ang ilang mga ka-ubanan ang mitiro kang Richie Sta. Iglesia tungod kay sama sa ubang mga mi-abin sa tropa sa gobyerno, target siya sa ilang liquidation squad.
Sa eksklusibong pakighinabi sa Bombo Radyo Butuan, gipadayag ni Ka Diwa nga dugay na nilang gipahimangnuan ang biktima nga mututok na lang sa pagpanguma tungod kay gawas sa pagka-CAA member, wala man niini biyai ang panguma hinungdan nga hayag na kaayo silang target nga likidahon.
Ang tanan matud pa nga mga mag-uumang mu-abin sa tropa sa gobyerno, natural nga himuon usab nilang legitimate target tungod kay ang armas nga ilang gikuptan, gipunting man usab ngadto sa ilang grupo.
Samtang hugot usab nga gikondena sa National Intelligence Coordinating Agency kon NICA-Caraga ang gihimo sa walhong grupo kansa wala magtan-aw kung kinsa ang muhubi sa na-ilo nga pamilya sa biktima ilabina nga gagmay pa ang tulo ka mga anak niini.
Sigon ni NICA-Caraga spokesperson JC Solomon, ang gihimo sa rebeldeng grupo, siguradong ilang itaho nga kalampusan sa ilang umalabot nga ika-53 nga anibersaryo sa katukuran sa New People’s Army karong Marso 29.
