Butuan City – Miabot sa 600-mil ka pesos ang kantidad sa nakumpiskang gitoohang shabu human sa malampusong buy-bust operation kaganing alas 4:50 sa hapon sa may Purok 3, Brgy. 15 San Ignacio, Butuan City.
Nasayran nga nadakpan sa maong operasyon ang subject nga si Henry Jay Diaz Catarman, 41-anyos, olitawo, walay trabaho nga residente ra usab sa maong dapit.
Mihimo sa maong opersyon ang Philippine Drug Enforcement Agency kon PDEA- Dinagat Island PO kansa maoy lead unit kauban ang Agusan Del Norte Provincial Office, PDEA Intelligence and Investigation Section og Butuan City Police Station-1.
Miresulta kini sa pagkakumpiska sa 20 ka sachet nga dunay sulod sa gitoohang shabu nga mitimbang og 100 gramos nga dunay Standard Drug Price sa 600-mil ka pesos. Lakip usab sa nakumpiska ang usa ka inablihan na nga sachet nga dunay lama sa gitoohang shabu, paper bag nga gisudlan sa mga gi-repak nga shabu, usa ka aluminum foil, tulo ka lighter, usa ka improvised glass water pipe, usa ka weighing scale, og usa ka unit blue sa android phone. Nakuha usab ang usa ka one thousand peso bill nga dunay serial number og ang 29 ka book nga tag-usa ka libo ka pesos nga boodle money.
Ang nakumpiskang mga butang lakip na ang dinakpan, gidala kini sa PDEA-Caraga alang sa tukmang disposasyon.
