BUTUAN CITY – Malampuson nga nasurender ang 2 ka tag-as nga kalibre sa armas lakip na ang pagpambusikad sa usa ka kanhe miyembro sa Milisyang Bayan ngadto sa mga kasundaluhan sa 30th Infantry (Fight On) Battalion, Philippine Army sa nakalabay nga adlaw.
Nahitabo ang pagtahan sa mga armas samtang nagpahigayon og Community Support Program (CSP) ang mga tropa sa 30IB sa komunidad sa Brgy. Magtangale, San Francisco, Surigao del Norte.
Sa padayon nga mga aktibidades sa CSP malampuson nga na-agni ang tibook komunidad nga makig-alayon sa gobyerno ug isurender ang pagsuporta nila sa teroristang grupo nga New People’s Army kon NPA.
Kini ang rason sa pagtug-an sa miyembro sa Milisyang Bayan ang nagbulgar sa impormasyon mahitungod sa gitagoan sa mga armas ug pampabusikad.
Gelayon usab nga nagpahigayon og Retrieval Operation ang 30IB og dinhe na nakumpirma ug nakuha ang iligal nga improvised explosive device kon IED, usa ka 5.56 M16 rifle ug usa ka M79 grenade launcher sa kabukirang parte sa nasangpit nga barangay.
Sa pamahayag ni Lt. Col. Ryan Charles Callanta, Commanding Officer sa 30IB, gipasalamatan niini ang padayon nga pakighiusa sa katawhan aron makab-ot ang gitinguha nga kalinaw. Giklaro pa sa opisyal nga padayon nga maghimo og CSP sa mga barangay sa Surigao del Norte.
Tumong niini nga sayron ang mga panginahanglanon sa katawhan ug aron mahatagan og solusyon sa gobyerno pinaagi sa National Task Force to End Local Communist Armed Conflict kon NTF-ELCAC.
