BUTUAN CITY-Gi-andam na ang lubong alang sa usa ka lider sa rebeldeng grupong New People’s Army kon NPA nga napatay sa engkwentro tali sa tropa sa 30th Infantry (Fight On) Battalion, Philippine Army sa Barangay Alipao, Alegria, Surigao del Norte ning miaging adlaw.
Gi-ila ang napatay nga si Alyas Wolf nga taga Km. 8 Brgy Bolhoon, Lungsod sa San Miguel Surigao del Sur nga kasamtangan gipakisayran pa ang tinuod nga pangalan.
Si Alyas Wolf usa ka ordinance expert sa tibook Guerilla Front 16 nga maoy tig-gama sa mga illegal nga Improvise Explosive Device (IED) nga dugay nang gidili sa Geneva Convention ug International Humanitarian Law apan padayon gihapong gihimo sa walhong kalihukan ug walay pagduha-duhang gigamit sa mga walhong grupo.
Usa usab kini ka full time member sa Sub-Regional Committee ug kanhi pangulo sa Sandatahang Yunit Pangpropaganda (SYP) 16C ug 16B sa GF16, North Eastern Mindanao Regional Committee.
Nahitabo ang engkwentro human nakadawat og taho ang 30th IB nga nangilkil matud pa ang armadong grupo ug nanghadlok pa sa komunidad.
Dali kining girespondihan sa kasundaluhan pinaagi sa pagpatrolya kondiin gipabuthan sila sa gitoohang mga miyembro sa Sandatahang Yunit Pangpropaganda sa gihiusang pwersa sa 16C1 nga gipangunahan ni Roel Neniel o mas naila isip si Alyas Jacob ug 16C2 nga gipanguluhan usab ni Alberto Castañeda nga mas naila nga si Alyas JD.
Milungtad og halos usa ka oras ang pagbinaylu-ay og bala kondiin namatay si Alyas Wolf ug nakuha ang tulo ka tag-as nga klase sa armas sama sa usa ka M16 Rifle,usa kaAK47 Rifle usa usab ka AR15 Rifle ug uban pang kagamitan sama sa usa ka Rifle Grenade, usa ka Anti-Personnel Mine, Baofeng radio, nagkada-iyang klase sa supply sa mga tambal, usa ka BP Apparatus, duha ka Magazines sa AK47, tulo ka Magazines sa M16, lima ka Poncho tents, duha ka duyan, duha ka pares sa rainboots, nagkadaiyang kagamitan nga gamit sa pagpabusikad, napulo ka 1.5V battery, ug usa ka rolyo sa electrical wire (50 meters), usa ka bandolier ug 970 nga bala sa Ak47 rifle.
Dako ang pagpasalamat ni Lt Col Ryan Charles Callanta, hepe sa 30th IB ngadto sa tanang nakighi-usa sa tumong sa kasundaluhan aron hingpit na nga masinatian ang kalinaw sa ilang lugar.
