BUTUAN CITY- Gikumpirma ni Michiko De Jesus tigpamaba sa LGU-Butuan nga boluntaryo na lamang ang pagsuot og faceshield sa tanang pampublikong lugar sa dakbayan sa Butuan nga nag-sugod kagahapong adlawa, November 19, 2021.
Sumala kang De Jesus sa pakighinabi sa Bombo Radyo Butuan, subay ang maong lakang sa mando ni Butuan City Mayor Ronnie Vicente C. Lagnada pinaagi sa Executive Order No. 53.
Ang maong EO nahisubay usab sa gi-aprobahan ni Pangulong Rodrigo Duterte nga rekomendasyon sa Inter-Agency Task Force Resolution No.148-D Series of 2021.
Sigon ni De Jesus magpadayon pa ang pagsuot sa faceshield alang sa medical kon quarantine facilities ug sa health care workers sa healthcare settings.
Alayon niini, nanawagan ang tigpamaba ngadto sa mga Butuanon nga bisan og boluntaryo na lamang ang pagsuot sa face shield dili gihapon magpasagad ug magkumpyansa ang katawhan labi na sa panahon sa kapaskuhan.
Ipadayon gihapon ang pagsuot sa face mask, pag-obserbar sa social distancing, paghugas sa mga kamot, ug labaw sa tanan ang pagpabakuna aron magpadayon nga moubos ang kaso ug hingpit nga mapukan ang virus sa syudad.
