BUTUAN CITY – Nagmalampuson ang tanang kalihukan sa 14 ka mga tunghaan ning rehiyon sa Caraga nga apil sa pilot implementation sa limited face-to-face classes alang sa 100 ka mga piniling tunghaan sa tibuok nasud.
Sa eksklusibong pakighinabi sa Bombo Radyo Butuan, gipadayag ni Department of Education kon DepEd-Caraga spokesperson Peter Tecson nga parehong excited ang mga magtutudlo ug mga magtutungha sa unang adlaw sa in-person classes ilabina nga kini ang unang higayon nga sila nagkakita sukad mi-ulbo ang COVID-19 pandemic.
Gidugang ni Tecson, apil sa mga piniling tunghaan, naggikan sa Surigao del Norte ug Sur ug Dinagat Island Province.
Base sa ilang obserbasyon, gisunod sa tanang 14 ka mga tunghaan ang standard set-up sulod sa classrooms kondiin duna’y gitabil nga plastic barrier sa matag-lingkuranan, duna usa’y thermal scanner nga magsuta sa body temperature sa tanang musulod sa lawak-tunghaan ingon man alcohol alang sa saktong sanitasyon ug uban pa.
Dugay na matud pa nilang gipangandaman kini nga sitwasyon sukad niadtong gihugon-hugon pa kini hangtud nga pila ka higayon nang gisibog.
Standard operating procedure kon SOP na matud pa nga adiser musulod sa classroom ang mga bata, mu-adto una sila sa washing area aron mag-alcohol sa ilang mga kamot dayon magkuha sa ilang body temperature.
Gawas pa kini sa clinic sa matag-tunghaan nga duna’y medical personnel nga maoy mu-atiman sa posibleng duna’y mureklamo nga lain ang pamati sa ilang lawas. Duna usa’y gibutang nga security personnel ang hingtungdang local government unit.
Ang gikalipay nila og maayo mao ang hugot nga suportang gihatag sa lokal nga kagamhanan sa lungsod sa San Francisco, Surigao del Norte ngadto sa Balite National High School pinaagi sa pag-provide og school bus nga maoy magsundo sa mga estudyante gikan sa ilang pinuy-anan ngadto na sa tunghaan ug paghatud usab kanila sa ilang pagpa-uli.
Giklaro usab sa opisyal nga sa kindergarten, 12 lang ka mga magtutungha sa amtag-section ang tugutang makasalmot sa face-to-face classes samtang 16 alang sa grades 1 hangtud samtang 20 ka mga magtutungha usab alang sa junior ug senior high schools.
Niadto matud pang matag-section nga mu-abot sa 30 o lapas pa ang ihap sa mga estudyante, kinahanglang bahinon kini sa duha ka sesyon nga mao ang buntagon ug hapunon aron malikayan ang pagtapok na sa dinaghang mga estudyante.
Usa matud pa kini sa mga rason sa kada-adlaw nilang monitoring aron pagtapos sa matag-duha ka bulan, magduso na usab sila og rekomendasyon ngadto sa inter-agency body aron sutaon kung angayan pa bang ipadayon sa hingtungdang tunghaan ang face-to-face classes.
