BUTUAN CITY – Mukabat sa 73 ka mga bubong sa Purok 13-A ug B sa Brgy. Bit-os ning siyudad ang nakapahimulos sa libreng serbisyo sa nagkada-iyang ahensya sa gobyerno sa gilusad nga usa ka adlaw nga Barangayanihan Caravan Towards National Recovery ubos sa gihingusgan sa nasudnong kagamhanang Duterte Legacy Caravan.
Lakip sa mga libreng serbisyong na-avail sa mga residenteng namakwit human na-ipit sa giyera ning mi-aging mga buwan tali sa mga rebeldeng New People’s Army ug kasundaluhan ang birth registration nga gihanyag sa mga personahe sa City Civil Registrar, voter’s registration sa Commission on Election kon COMELEC, livelihood assistance gikan sa Technical Education, Skills and Development Authority kon TESDA, ug uban pa.
Sa eksklusibong pakighinabi sa Bombo Radyo Butuan, dako ang pagpasalamat ni Bit-os Brgy. Captain Elsa Mordeno tungod kay kini ang unang higayon nga naka-abot sa ilang barangay ang ingon niini nga serbisyong gihanyag sa kagamhanan.
Tungod sa dili tiaw nga kahadlok nga gibati sa mga residenteng na-ipit sa maong giyera, nanawagan si Kapitan Mordeno ngadto sa mga rebeldeng NPA nga unta dili na magsamok-samok sa ilang lugar.
Nanghinaut usab siya nga unta mubalik na sa sabakan sa balaud ang nasangpit nga mga rebelde.
