BUTUAN CITY- Nabalaka na ang probinsyal nga pagamhanan sa Agusan del Sur nga basin nakabaton na og delta variant sa coronavirus disease ang ilang probinsya.
Kini human na usab ang grabe ka paspas nga pagsaka sa ihap sa mga nataptan sa covid sa ilang lalawigan sa nakalabay nga mga adlaw ug midugang pa ang pagkumpirma sa DOH- Caraga nga aduna nay pinaka-unang kaso sa delta variant ang rehiyon nga gikan sa munisipyo sa Barobo ,Surigao del Sur.
Sa pakighinabi sa Bombo Radyo Butuan ,gibutyag ni Alfredo Nonoc Plaza tigpamaba sa probinsyal nga paggamhanan sa Agusan del Sur nga bisan wala pay kumpirmadong delta variant cases nga natala sa ilang lalawigan apan daghan matod pa sa mga pasyente nga severe nga na-admit karon sa mga ospital ang nagpakita og mga susamang senyales sa maong makatakod nga variant.
Sigon ni Plaza naghulat pa sila sa resulta sa mga sample nga ilang gipadala sa Philippine Genome Center.
Sa nakalabay nga adlaw dili mo-ubos sa 100 ang matalag mataptan sa COVID-19 sa Agusan del Sur hinungdan na usab aron mag-awas-awas na ang mga pasyente sa mga ospital.
Gidugang ni Plaza nga gikabalak-an usab nila karon ang posibleng pagkulang na unya sa suplay sa oxygen human usab ang ubay-ubay nga matalang makabaton og severe nga kaso sa maong virus nga maglisod og ginhawa gawas pa sa pagkulang na karon sa ilang mga healthcare workers.
Rasong subsub nalamang ang panawagan niini sa mga katawhang AgSurnon nga motuman sa mga gitakda nga tamdanan sa pagbatok sa virus ug mosunod sa mga panawagan sa gobyerno.
Sa pagka-karon kamulo sa paghimo og diskarte ang tanang munisipyo sa maong lalawigan sa pag-kontrola sa kaso sa virus sa ilang tagsa-taga ka nasakupan.
