BUTUAN CITY – Nabalaka ang Commission on Election kon COMELEC-Caraga nga basin dili maka-parehistro ang ubang tao aron makabotar sa umaabot nga piniliay karong aduna pay mga lugar sa rehiyon ang napailalom pa gihapon sa Modified Enhanced Community Quurantine kon MECQ.
Ubos sa standing policy sa Comelec nga kung ang usa ka lugar napailalom sa ECQ o MECQ otomatikong magsirado ang ahensya sa maong mga lugar ug mag-work from home ang mga empleyado.
Tungod niini nabalaka si Atty. Francisco Pobe Regional Director sa Comelec Caraga sa kung unsaon karon pag-apas sa pagparehistro sa mga tao sanglit wala may gitugutang transaksyon sa maong opisina ubos sa maong quarantine classifications.
Madumdumang ang Butuan City ,Surigao del Sur ug Dinagat Islands padayong ipailalom sa Modified Enhanced Community Quarantine sugod Hulyo 1 hantod 15.
Gipadayag sa opisyal nga nangita na usab sila og pamaagi aron matubag ang maong kabalaka dungan sa panghinaot nga malibkas na ang MECQ quarantine sa daling panahon.
Giklaro usab sa opisyal mamahimo gihapon makapahigayon og ilang voters registration ang mga probinsya dinhi sa rehiyon nga wala gideklarang mapailalom sa ECQ ug MECQ.
