BUTUAN CITY – Aminado si 23rd Infantry Battalion, Philippine Army commander LCol. Julius Caesar Paulo nga usa sa ilang mga sakop ang nalambigit sa pagpamusil ning mi-aging gabii sa District 2, Brgy. Ata-Atahon, Nasipit, Agusan del Norte.
Sa eksklusibong pakighnabi sa Bombo Radyo Butuan, gipadayag ni Col. Paulo nga gikasubo kaayo sa ilang yunit ang nadangatan sa mag-amahang Yonson dungan sa pagklarong ila nang gitugyan ngadto sa Nasipit Municipal Police Station ang suspek nga si PFC Dante Aquino alang sa tukmang disposasyon.
Gisaysay pa niini nga pasado alas-onse na matud pa ning mi-aging gabii dihang iyang nasayran ang maong panghitabo base na usab sa saysay sa suspek kinsa iya pang gipatambalan sa may Provincial Hospital tungod sa samad sa kamot nga iyang na-angkon.
Didto na matud pa sa maong ospital nagpalabay og kagabhi-on ang suspek nga si Aquino hangtud nga iya na kining gipa-turn over sa Nasipit Municipal Police Station kagahapon sa buntag aron masugdan gilayon ang dagan sa imbestigasyon ug ang pagpasaka og tukmang kaso batuk kang Aguino.
Wala usab niini gikumpirma o kaha gipanghimakak ang posibilidad nga duna’y ka-uban ang suspek nga mao usa’y mitiro sa biktimang anak nga si Bernard Yonson dungan sa pagpasabot nga anaa na sa kapulisan ang tanang kagahom pagsuta sa tinuod nga panghitabo.
Nasayrang base sa inisyal nga report sa Nasipit Municipal Police Station, migawas nga nagtambay matud pa sa waiting shed duol sa ilang panimalay sila Bernard uban ang igsoon niining si Jay ug usa ka Jerome Librado hapit na alas-dies kagabii.
Miduol matud pa kanila ang lalaki ug nangutana kung unsa ang pangalan sa maong lugar apan wala kini matubag ni Jerome sa rasong midayo lang usab siya kansa gikasuko sa maong lalaki nga sa kaulahian, nailang si Dante Amelier Aquino, 34-anyos.
Miduol matud pa ang suspek sa iyang ka-uban samtang ang amahang si Marcos, mi-uban usab sa iyang mga anak sa waiting shed ug dihang mibalik na ang milakaw nga si Aquino, dinhi niya gipusil si Marcos sa makadaghang higayon.
Dihang nakita kini sa anak nga si Bernard, dali niining gilayog ang gunman resulta sa ilang pagkatumba apan miduol kanila ang ka-uban sa suspek dayong pusil usab kang Bernard sa makadaghang higayon adiser nanibat.
Gidala pa sa ospital ang mga biktima apan gideklara kining dead-on-arrival sa attending physician.
Dugang pa ni Col. Paulo, kinahanglan matud pang atubangon sa iyang sakop ang mahimong resulta sa imbestigasyon sa rasong dili niya i-tolerate ang ingon niini nga binuhatan ilabina ang pag-atubang sa kasong kriminal samtangsa ilang han-ay, kasong administratibo usab ang ilang ipasaka batuk kang Aquino.
Misaad kini sa katawhan nga trabaho gihapon nila ang padayong paghatag og proteksyon sa katawhang sakop sa ilang ara of responsibility hinungdan nga ang ilang mga sakop nga mulapas niini, mag-atubang sa silot nga angayan nilang atubangon.
