BUTUAN CITY – Temporaryong gisuspende sugod kagahapon hangtud karon Lunes Hunyo 14, ang trabaho sa tanang opisina sa Cabadbaran City Hall ug sa ilang Sangguniang Panglungsod building human nagpagawas og memorandum order si Mayor Jodi Chin-Amante kagahapon tungod sa ubay-ubay ka mga empleyado sa City hall nga nagpositibo sa Antigen ug RT-PCR test.
Sa eksklusibong pakighinabi sa Bombo Radyo Butuan, gibutyag ni Roselyn Exaure, tigpamaba sa Cabadbaran City government, gibutyag niini nga adunay empleyado sa City Mayor’s office ang naka-close contact sa nagpositibo sa COVID-19 atol sa summer job fair hinungdan nga gipa-ilalom na usab ang tanang empleyado sa maong test.
Gikadismaya sa mayor ang natalang mga positibong kaso sa iyang opisina taliwala ang kasagari sa mga niini, nakadawat na sa unang dose sa bakuna. Hinoon ang tanang mga nagpositibo wala na gipapauli kagahapon sa ilang mga panimalay ug diretso na sa isolation facility.
Sumala pa ni Exaure, naka-eskedyul na usab karung adlawa ang pagpa-ipailalom sa RT-PCR test sa tanang empleyado aron masiguro ang himuong aksyon. Dugang pa niini, alarming na kaayo ang natalang kaso sa ilang syudad human nga gi-anunsyo usab sa DOH-Caraga nga duna na’y nakasulod nga variant sa ilang lugar.
Plano karon ni Mayor Amante nga ablihan ang bag-ong dakbalay nga anaa nahimutang sa Brgy Bay-ang nga dunay 50 bed capacity tungod kay puno-puno na ang ilang mga pasilidad sa mga duna’y COVID-19.
Padayon usab ang disinfection sa city hall building ingon man sa Sanguniang Panglungsod building. Gisuspende na usab sa City Mayor ang tanang naka-eskedyul nga community service human base sa nakalatid sa executive order sa mayor ning mi-aging semana diin lakip sa nakalatid niini ang liquor ban sa tanang pampublikong lugar lakip na sa mga sari-sari store, convenience store ug uban pang pampulikong tindahan.
Magsugod usab sa alas 8 sa gabii hangtod sa alas 5 sa buntag ang ilang curfew hours alang sa mga menor de edad ingon samtang ang alang sa mga hamtong, magsugod sa alas-10 sa gabii hangtod sa alas 5 sa buntag ug gidiskorahe usab sa lokal nga kagamhanan ang pagpahigayon og mga mass gatherings aron nga malikay ang pagtinakdanay sa virus.
