BUTUAN CITY – Mas gipalig-on pa sa Special 6th Division sa Court of Appeals ang pag-revoke sa Securities and Exchange Commission kon SEC sa Certificate of Corporate Registration kon CCR sa Kabus Padatuon kon KAPA Community Ministry International Incorporated.
Kini human napakyas ang KAPA nga girepresentahan sa ilang dako-dako nga si Pastor Joel Apolinario, pagpresenta og substantial evidence aron unta dunggon ang ilang gidusong petition for review sa ingon pugngan ang desisyon sa SEC niadtong Abril 3, 2019 pag-revoke sa ilang Certificate of Corporate Registration.
Nasayrang gi-withdraw sa petitioner ang ilang petisyon pinaagi sa pagduso og manifestation niadtong Marso 2019 kondiin gi-manifest sa petitioner nga wala sila nakadawat og kopya sa Cease and Desist Order aron ma-circumvent ang procedures. Ang pagpamakak sa petitioner napamatud-an human nasutang nag-file sila og urgent motion aron tangtangon ang Cease and Desist Order.
Tungod niini, nagpagawas og resolusyon ang SEC niadtong Marso 14, 2019 nga nagdeklara sa Cease and Desist Order nga permanente na, hinungdan nga gisibog na sa petitioner ang ilang mosyon. Tungod niini, wala makumbinsi ang Court of Appeals nga gibalibaran sa SEC ang petitioner sa ilang batakang katungod alang sa due process human nga nahatagan silla og higayon aron depensahan ang ilang kaugalingon.
Ang pagpasagad sa panig sa petitioner maoy rason nga napalpak sila pag-avail sa mga remedyo nga gihatag kanila sa balaud.
Gawas pa, naka-establisar usab ang respondent og lig-ong ebidensya nga nalambigit ang KAPA ingon man si Apolinario ug iyang mga alipores sa ilegal nga investment activity.
