BUTUAN CITY – Gihulat na lang sa Police Regional Office kon PRO-13 ang commitment order gikan sa issuing courts alang sa upat ka mga ranking New People’s Army kon NPA leaders nga nadakpan sa duha ka adlaw nga operasyong gihimo sa joint police-military raiding team.
Sa eksklusibong pakighinabi sa Bombo Radyo Butuan, gipadayag ni PMajor Dorothy Tumulak, information officer sa PRO-13 nga duna’y warrants of arrest sa kasong murder ug paglapas sa RA 9851 kon ang bag-ong “Philippine Act on Crimes Against International Humanitarian Law, Genocide and Other Crimes Against Humanity” nga gi-atubang ang mga nasikop.
Unang nadakpan niadtong Biernes sa Purok 12, Barangay Doongan si Isias Geñorga, 73-anyos, naila sa alyas nga “Ising”, gika-ingong membro sa Executive Committee (Execom) ug Secretary sa Regional Urban Committee (RUC), Regional White Area Committee, Northeastern Mindanao Regional Committee (NEMRC).
Pagkasunod adlaw nadakpan si Gina Tutor, alias “Cora”, 50-anyos, secretary general sa Gabriela-Agusan del Norte didto sa District 1, Barangay Sacol, Buenavista, Agusan del Norte, ug Eduardo Ventura Sr. didto sa Purok 4, Barangay Maliwanag, Esperanza, Agusan del Sur,
Samtang nadakpan didto sa Purok Lutos, Barangay Quezon, Mainit, Surigao del Norte, si Maria Vilma Dalangin alias “Mader”, 72-anyos, Secretary ug Head sa Regional Organizing Department of Regional White Area Committee, NMRC, ingon man recruiter ug organizer sa Nagkahiusang Mag-uuma sa Surigao Norte (NAMASUN), tungod sa paglapas sa Sec. 6 sa RA 9851.
Samtang gipasabot ni Tumulak nga trabaho lang sa pulis mao ang pagpatuman sa arrest warrant nga gipagawas sa korte ug dili tungod kay mgamembro sila sa progresibong grupo.
